هاني نبيل
عمنا عجوه عجوه ياهوه عيل عاش كل طفولته بهدمة قديمة متعاصة طين زهق الوالد باع قرطين كل ماحيلته وربط الشنطة وقال ع البندر ياد يافطين …… لم القرش فوق القرش لجل يربي ولجل يعلم ويشوف أولاده من الدارسين ….. عنده فطين دماغه طخينه بس مصمم يبقي أفندي ويلبس بدلة زي نعيم …… كبر البيه وبقي محامي ونشوف راسه تاخده لفين …. كل تجمع بين النخبه يروح يدس ويقول أنا أفندي وحد أمين ….. جه سيدحمد شافله وظيفة جوه نيابة في عابدين ….. راح الكازنو وشد المطوه وقل القيمة لأهل المهنة وللحاضرين ….. هات كارنيهك وأطلع بره ياد يا فطين …… راح أتقيد جوه نقابة قال هيدافع عن مساجين …… حبة خبص وشوية لبص وقضايا عملة ورقاصين ……. بقي العقر إللي يحل العقدة لوحده لو مربوطة ع التنين……. هبش الهبشة ولم اللمة وكل صنية يقعد ياكل بالأدتين……. قالوا تمامك تبقي رئيس لنادي كبير يابو خطين ……… جه المجدع يشتم فيهم ويهذقهم بالوالدين … ويطرد كل رموزهم بره كأنه شطبهم من التموين ……. والباقي يسكت رغم إهانته ويقول ناكل أمال نمشي نروح علي فين ……… وكل ماتيجي أزمة جديدة يطلع يشتم لجل يغطي ع البنزين ….. بس تجارب الدنيا تقولك إنه هينزل نزلة تقيلة هتجيب راسه تحت الطين …… قولي ياغالي شخصيتنا دي تبقي مين …..
