شعرمنوعات

الباب مقفول !

شعر / محمد عبد الجواد 

 

هتبكي عليا متأخر 

وبكرة تجيني متأثر 

تقولي سماح 

وأنا هارفض أمد إيديا للايد اللي جارجني 

وللنظرة اللي كلها غيظ وطول العمر دبحاني 

ما كان العمر قدامك .. وكان القلب خدامك 

وكانت أرضى مفتوحة وسايبها براح 

وأنت قسيت .. عليا جنيت  

وبالقسوة مليت إيديك .. خلفت كل مواعيدك 

وأنا ثابت ولا اتهزيت 

وإنت تعبت .. وأنا مرتاح

***********

أنا بإيدي زرعت الورد 

رميت أنت في أرضي الشوك 

وأنا عشت صاين للعهد 

وأنت كبرت قمت طغيت 

وكل الناس قصادي عابوك 

وعمري ما نطقت العيبة بلساني 

عشان أنا عشت طول عمري 

على هيبة اللي رباني 

بدرت أنا حبي في أرضك 

وشرك طرح براني وشيطاني 

وأنا عشت بُحب الناس 

وأنت فضلت وحداني وبتعاني 

سنين العمر قدامي 

وفاتحة لي دراعاتها 

وأنت خلصت يا أناني 

وهتجرب مرارتها 

وتشرب ذل قسوتها 

وتعطش قولي هات تاني 

********

كبير وأرعن ومتفرعن 

يا راجل خليك عندك دم 

هتعمل إيه بمشاويرك 

 هتطبخ إيه في مواجيرك  

ما زرعك بار .. هتحصد إيه؟ 

مفيش غير المرار والهم 

وناسك كلهم عارفين 

دا معرفتك يا راجل غم 

رسمت الخطة بشيطانك 

قعدت تغني وتفنن 

خسرت المعركة لوحدك 

رجعت حزين ومتجنن 

************

شيطانك وصلك للعند 

نسيت العشرة .. خنت الود 

حاولت كتير تكسرني 

وعضمي شديد بيستحمل 

وكام مرة تفكرني 

بظلمك وأنا متحمل 

سامحت كتير وعديتلك 

وعيشتك عليا الدور 

يا راجل يلا لم الدور

كفاياك زيف 

كفاية جهل مع تخريف

رفعت عليا شوف كام سيف 

وسيفك كان خشب مكسور 

هترجع يوم وتتوسل 

توسط ناس وتستهبل 

يقولوا أصله كان مجبور 

وأنا قأقول روح بقى يحنن

خلاص باب الوداد مقفول 

وحبل وصالنا مش مفتول 

ونرجع تاني م الأول نعيد ونقول

هتعمل إيه يا زمن 

مع واحد عنيد وأرعن؟

مقالات ذات صلة

اترك تعليقاً

لن يتم نشر عنوان بريدك الإلكتروني. الحقول الإلزامية مشار إليها بـ *

شاهد أيضاً
إغلاق
زر الذهاب إلى الأعلى