كتب / محموددرويش
فى البدايه عاوزين نعرف يعنى اى سلوك ؟ ويعنى اى تعديل ؟ واى السلوك الى هاعدله؟
السلوك هو كل نشاط يقوم به الفرد او اى فعل يصدر عن الانسان سواء كان ظاهر او غير ظاهر
التعديل يعنى التغير بس للافضل ومنه اكتساب سلوك جديد او انهاء سلوك غير جيد
علشان اعرف انا هاعدل اى سلوك لازم اعرف هل السلوك دا مناسب للمرحله العمريه ولا غير مناسب ؟ هل هو فعلا سلوك غير طبيعى ولا نظرتى انا للسلوك الى غير طبيعيه؟
علشان اعرف دا لازم اعرف خصائص كل مرحله . طيب بشكل مختصر كدا مرحلة الطفوله والى هايكون اغلب كلامنا عنها وعن مشاكلها تبدأ من الولاده لمرحلة بداية المراهقه يعنى لو صدر من المراهق سلوك طفولى يبقي غير طبيعى اما لو صدر من طفل فهو طبيعى والعكس طبعا.
وطبعا المشاكل السلوكية كتير منها فرط الحركه .تشتت الانتباه .الكذب . خوف اجتماعى .مص الاصابع . نتف الشعر.قضم الاظافر .التبول اللاارادى. الخوف من الظلام او الحيوانات . كرهه للمدرسة وكتابة الواجبات
*علشان اعرف هابدأ ازاى ومنين لازم اعمل حاجه اسمها (قائمة المشكلات السلوكيه) دى بكتب فيها كل المشكلات الى هاشتغل عليها مع الطفل . تانى حاجه هاعمل( قائمة المدعمات ) يعنى الحاجات الى طفلى بيحبها او ممكن تكون معزز له
علشان اعدل السلوك لازم فى الاول :
1- احدد السلوك الى هاشتغل عليه بدقة
2- احدد السوابق للسلوك ( الظروف السابقه لحدوث السلوك )
3- قياس السلوك يعنى اعرف هو شديد ولا خفيف
4- اصمم الخطة الى هاشتغل عليها
5- ابدا فى تنفيذ الخطة
6- تعميم للسلوك
عندنا مجموعة فنيات اختار منها هاشتغل بايه واي الفنية الى ممكن تجيب نتيجة مع الطفل ومع السلوك الى هاشتغل عليه
1-التعزيز : عندى نوعين من التعزيز ( ايجابى / سلبى )
ايجابى : اى حاجه بيحصل عليها الطفل بعد سلوكه الجيد تخليه يكرر السلوك دا كتير ( كتب واجبه جبتله شيكولاته او قولتله برافو عليك )
سلبى : تجنب شئ غير سار ( ضاغط على طفل فرط الحركه لحد مايخلص المهمه الى انت عاوزها فاتسيبه شويه يتحرك)
ملحوظة : خلى بالك انت بتعزز اى سلوك الصح ولا الغلط ( طفلى بيبكى وعلشان اسكته اديته شيكولاته ..كدا غلط عززت سلوك البكاء كل مره هايحتاج شيكولاته هايعيط )
* فرق بين التعزيز و الرشوة لو اديته حاجه بيحبها علشان يسكت كدا بترشيه مش بتعزز سلوكه التعزيز بعد السلوك
2- العقاب برضه عندى نوعين ( ايجابى / سلبى ) الهدف منه الحد من تكرار السلوك عكس التعزيز
الايجابى : زى التوبيخ للطفل لما بيعمل حاجه مش كويسه
السلبى : زى حرمانه من اشياء لها قيمه بالنسبه له ( اخد لعبه من العابه مثلا او احرمه من مشاهدة التليفزيون )
3- الاطفاء اوالمحو او التجاهل : تجنب التعزيز لسلوك كان بيعزز من قبل ( طفلى مزعج وبيزعق وكل مايعمل كدا اوجه انتباهى له دا تعزيز لسلوك خاطئ .ابدأ اعمل اطفاء او تجاهل للسلوك للحد منه ( يزعق ماانتبهلوش ) واحده واحده هايبطل يزعق . بس خلى بالك ان الاطفاء برضه ممكن يحصل بشكل لا ارادى للسلوك الجيد ( ابنى جاب درجات كويسه الشهر دا فى الامتحان وانا ما اديتوش اى اهتمام خلاص مش هاتفرق معاه بعد كدا انه يجيب درجات وحشه كدا عملت اطفاء لسلوك جيد) علشان كدا بيفضل يصاحبه تعزيز للسلوك الجيد
4- التصحيح الذائد: الطفل يتحمل نتيجة غلطه ( رمى الالعاب يلمها بنفسه ) ولوطفل كبير مثلا وكسر حاجه اخصم من مصروفه تمن الحاجه دى وطبعا يكون عارف.
5- التشكيل : عاوز اعلمه سلوك معين بس معقد شويه بالنسبة له زى مثلا غسيل اسنانه ..
اعمل تجزئة للسلوك واقسمه لاجزاء واعزز كل جزء يقوم به .. تعالى ناخد مثال
( يروح يجيب الفرشه والمعجون/ فتح المعجون / وضع معجون على الفرشاه/ يعيد غطاء المعجون/ ينظف اسنانه/ يضع الماء فى فمه/ ينظف الفرشاه/ يضع الفرشاه والمعجون مكانهم/ ينشف ايده وفمه ) واعمل تعزيز لكل مرحلة من دول اقوله شاطر او برافو ا اى معزز مع كل حركه
6- التسلسل : زى التشكيل بالظبط برضه بجزأ السلوك لاجزاء صغيره بس بعزز السلوك فى النهايه .
7- النمذجة او الاقتداء : تقديم نموذج حى او مصور مقصود او غير مقصود لتقوية سلوك معين عند الطفل او تعليمه سلوك جديد
8- التعويد او الكف بالنقيض: يستخدم الاسلوب دا فى علاج المخاوف عند الطفل .مثلا طفل بيخاف من الظلام او من حيوانات اليفه ( الفكره هنا انى بعمل ازاله لاستجابه مرضيه زى الخوف او القلق تدريجيا باستبدالها بسلوك اخر معارض اصلا لاستجابة الخوف . ناخد مثال
طفل بيخاف من الارنب ودا عامله قلق وكوابيس ابدا اوريله الارنب من على مسافة بعيده. وبعدين اقربه تدريجى منه فى الوقت الى بياكل فيه شيكولاته وانا بشجعه وابتسم له واقله عبارات هاديه عن الارنب.
9- تعديل اخطاء التفكير : الاسلوب دا مرتبط بعدة اشياء زى نقص المعلومات عند الطفل وسذاجته فى حل المشكلات-تفكيره الخاطىء – رأى الطفل او فكرته عن نفسه وعن المحيطين به- توقعاته الغير صحيحه للموقف
المفروض انى بشتغل على كل فقرة من دول هاوضحها فى فقرات جايا ان شاء الله
10- ضبط المثيرات : بقوم بعمل تنظيم للبيئه المحيطة بالطفل او اى شئ مرتبط بالسلوك الغير جيد.
يعنى مثلا طفل بيشتم : ابدأ اشوف بينزل الشارع؟ اقلل من نزوله الشارع / اشوفه مصاحب مين ممكن حد يكون اتعلم منه لسوك الشتيمه وابدا اظبط الدنيا للطفل للحد من السلوك الغير جيد وابداله بسلوك جيد
ان شاء المرات الجايا هانقدم نماذج لسلوكيات غير جيده وكيفية تعديلها
